唐閣 - 沒有深刻印象

假期的第一天, 一早就去了彈安息禮拜, 能夠充實的過每一天, 也是神的恩典, 能夠繼續去彈下去, 也實在要珍惜. 之後落返去尖沙咀, 同文迪會合, 就上來了這家酒店飲茶, 享受一下假期. 之前吃的米記二星也是西餐, 中餐就係第一次.

環境是沒有挑剔的地方了, 坐位擺得闊落, 跟隔離臺保持一定的空間感. 不過係比較昏暗, 相對外面的大太陽, 更令人有想睡的感覺. 服務方面, 一坐底就出問題了, 叫了茶係忘記送來, 開茶都要等好一陣子. 但似乎只係個別事件, 之後的服務係相當稱心的.

兩個人吃點心, 都係叫幾樣好了. 共有26個選擇, 當中揀了5個鹹點, 2個甜點來試.

叉燒焗餐包 $35: 7分, 一客3件, 賣相也對辦, 但一咬落口, 咦, 溫溫吞吞的, 似乎實在不太對路. 包是鬆軟的, 叉燒也幾靚, 肥瘦適中, 但不夠熱的叉燒餐包始終令人失望.

沙爹牛肉煎腸粉 $45: 8分, 一大煲上, 份量算幾多. 沙爹汁點上煎腸粉, 相當香口, 牛肉沒有化學成份, 也可以.

原隻鮑魚雞粒酥 $40: 7分, 一件$40, 都係只要一客好了. 又係那個問題, 不夠熱, 溫溫吞吞的, 鮑魚普普通通, 但總算煮得火候剛好, $40一小件, 試過算數.

香滑麻茸包 $35: 5分, 見有小弟喜愛的麻茸包, 當然要一客. 包濕了點, 麻茸不夠香, 見圖大家或許不能看出, 其實而個係迷你版麻茸包, 份量係非常袖珍. 跟福記的比......

龍蝦瑤柱灌湯餃 $83: 6分, 也想到應該不是老式做法, 但也要了一客分吃. 龍蝦肉比較老, 也沒有鮮味, 幸好小弟吃完也沒有敏感. 個湯只係清湯般的, 味道一般. 要到$83一客, 好像不太值得了.

蓮蓉西米焗布甸 $35: 8分, 全個下午最好的還算這個布甸, 文迪覺得偏甜, 小弟覺得以蓮蓉西米焗布甸來講, 甜度是能夠接受. 蓮蓉小小的, 幾香, 焗得熱辣辣, 係忍不住一口一口的吃下去.

迷你風車酥 $33: 7分, 賣相幾精緻, 但熱度又係不夠. 為何? 個酥幾鬆化的, 一口吃完一件, 不錯的.

整體來講, 不是差的, 但又不能令人留下深刻印象. 當然, 這裡優勝的地方係舒適的環境. 悠閒的吃個午餐, 還是寫意的. 當然, 跟其他二星法餐去比, 又好像有一大段距離了.

評分
味道: 7/10
環境: 9/10
服務: 9/10
抵食: 6/10
推介度: 7/10

餐廳資料:
唐閣

尖沙咀北京道8號香港朗廷酒店1樓
2375 1133