泰潮 - 不太理想的招牌菜

又繼續我的必比登推介之旅, 是日就來到此店. 在新一年的必比登中, 這裡算是其中一間比較多爭論或者負面評價的店子. 我還是那句, 未吃過我是不會下定論的, 就拉文迪一同來試.

下午的時份, 人客不少. 原來這裡是兩店相連, 是總店跟第一分店連在一起, 都幾搞笑. 店子叫做泰潮, 其實也不算正式泰菜店, 因為食物就只有海南雞, 豬脾, 湯粉同埋串燒, 應該是專門店吧. 兩個人來, 總不成吃兩客海南雞飯, 就一客雞飯一客豬脾飯吧.

泰式海南雞飯餐 $40: 6分, 套餐包括無骨海南雞飯, 老火清雞湯同埋泰式青瓜沙律.

先來的是老火清雞湯, 無乜味道, 淡淡的, 也不太像老火, 反而像滾湯多一點.

泰式青瓜沙律就相當辣, 吃一件就夠皮, 不過以辣度來計, 應該令辣人滿意.

主角無骨海南雞飯就只算一般, 飯粒還算幾香, 不過就幾硬. 雞肉偏實, 不夠嫩滑. 吃到的已經是黑肉部份, 但水準還不太行, 不知白肉會怎樣呢? 這個招牌作, 只是一般.

泰式滷豬脾飯餐 $40: 3分, 套餐包括泰式滷豬脾飯, 老火清雞湯, 泰式鹹菜, 滷水蛋同埋滷大腸. 雖然以泰式滷豬脾掛頭牌, 但滷豬脾的份量實在太少, 成碟飯以泰式鹹菜及滷大腸為主. 滷大腸好腥, 不太受得了. 滷水蛋幾入味, 不俗. 泰式鹹菜好鹹, 用來撈飯也覺得好鹹. 滷豬脾是無乜肉, 皮就相當肥. 感覺上這個泰式滷豬脾飯, 只是用了搭頭搭尾的次等材料做成, 不太對勁.

套餐不包飲品, 就加$6x2要了樽裝可樂兩支.

兩個招牌的水準, 一個普通, 一個不太理想. 價位不便宜, 服務態度麻麻, 環境擠逼. 吃完這餐, 只想講的是, 比這裡好吃的海南雞飯, 應該有排都未數得完.

評分
味道: 4/10
環境: 4/10
服務: 4/10
抵食: 4/10
推介度: 4/10

餐廳資料:
泰潮
深水埗福榮街101號地下
2314 3333