逸東軒 - 不能不試的馬拉糕

好像有一段日子沒有跟大家慶祝生日, 但來到2月, 當然要為這位姊妹慶祝. 不是單純的晚飯局, 要計算到環境, 又要考慮到食物, 最後揀了這家早前來過飲茶的逸東軒.

逸東軒是新一年的一星餐廳, 好像沒有太多朋友寫過食評, 既然如此, 就讓小弟在此記下當晚的情況.

先講環境, 是相當不俗, 有無敵大海景, 擺位也舒適, 單從這方面看, 是有星級表現. 我們一行十二人, 有人身體不適, 又有人不太愛吃肉, 不如就叫得清一點, 也經濟一點, 避開了一眾海鮮.

鮑汁豬仔腳: 8分, 先來的是頭盤豬仔腳, 鮑汁幾入味, 頌揚還特別要了碗白飯去撈汁, 一個人吃光了全碗飯.

三味弄豆腐: 7分, 三種不同的豆腐菜色, 最喜歡的是冷豆腐加上鹹蛋黃同埋肉鬆, 清淡加上香口的感覺. 滷水豆腐的滷水味不太突出, 甜酸豆腐也不太特別. 另外還有一格是青瓜, 中間反而甚麼也沒有. 賣相來看, 其實能夠做得更好.

桂花火樹銀絲: 7分, 簡簡單單的火腿芽菜炒蛋, 炒得幾香口, 不太油.

薑汁芥蘭油鴨髀: 7分, 是晚叫了不少菜, 包括這個芥蘭, 都幾鮮嫩, 油鴨髀是幾有鹹香, 剩吃的話或許味道比較重, 加上芥蘭就更合適.

逸東一字排骨: 8分, 相當鬆化的肉質, 揀了件偏瘦的, 一樣不會實實. 個汁都不俗. 用上了店的名字, 果然有水準. 我們兩個人只分吃了一件, 轉眼已經一件也沒有, 看來大家也好喜歡.

砂鍋桂花魚球浸時蔬: 7分, 又來一客菜蔬, 桂花魚不會有腥味, 但就不算好有鮮味, 啖湯反而幾入味.

芙蓉蒸山水豆腐: 7分, 豆腐幾滑, 面頭淋上蛋汁, 簡單清淡, 真的相當健康.

鮮沙薑陳皮生煎雞: 7分, 是上臺後再煎的一道菜, 當然係比較香口, 沙薑味不太出, 陳皮就足夠. 雞肉偏實, 似乎應該要縮短煎的時間.

大澳蝦醬唐生菜膽: 7分, 另一個堂弄的菜色, 蝦醬炒得相當之香, 也好大陣味, 之後隔離臺叫這碟菜也一樣聞得相當清楚, 要受得了蝦醬味先得. 生菜係幾鮮嫩, 不錯.

魚湯叉燒米線: 8分, 叉燒是另外用碟上. 這裡的叉燒也是招牌來, 是晚的比較瘦, 但肉質也不會太實, 當然, 如果連上點肥肉會更好. 魚湯米線個湯幾鮮甜, 米線也幾爽口.

牛鬆炒飯: 6分, 炒得不算夠鑊氣, 無乜火氣, 不過就幾乾身, 填肚之選.

原籠千層馬拉糕: 9分, 是晚的重頭戲, 當然是這個馬拉糕. 一客六件, 要了兩客, 剛好一人一件. 熱辣辣, 鬆化, 中間的奶黃好香, 實在是不能不試的招牌作. 大家也覺得只要一件也不夠.

這裡的食物整體水準是幾平均. 當然, 是晚只是叫了一些簡單清淡菜色為主, 但也沒有令人失望. 服務方面, 只係一般, 態度是不太友善, 但也算跟得幾好. 想吃一餐經濟一點的一星晚餐, 這裡也會是個好選擇. 再加上大家又能夠一家人同臺吃飯, 實在是高興的一晚.

評分
味道: 8/10
環境: 8/10
服務: 6/10
抵食: 8/10
推介度: 8/10

餐廳資料:
逸東軒

灣仔港灣道23號鷹君中心2樓
2878 1212