翠玉軒 - 平平的一星中菜

能夠在父親節一家人一同吃飯, 是我們的福氣. 這一年的父親節飯, 分兩天進行, 星期六的這晚, 跟父母文迪四個人, 來了這裡先吃. 這家一星店, 被不少人批評選得不合宜, 就趁這機會, 看看它的水準.

一早訂了位, 又來了落訂$400, 先有八八折. 但其實也係比平日貴, 因為是晚沒有平日的餐牌, 無論係散叫或者叫套餐也要吃父親節特別餐牌. 當然, 在節日期間, 加價也實在無可厚非.

這裡的地方相當之大, 而是晚雖然有公司宴客佔了不少地方, 最後其實還有不少空位. 節日前的成績也是如此, 或許這裡的重點在午市? 人客不算多, 臺與臺之間能夠有一定距離, 加上裝修係幾舒服. 在環境一欄來講, 是幾好的.

從食友的食評中, 知道這裡有甚麼係值得試, 再加上自己的心水, 就定了以下幾樣菜色.

花膠菜膽燉花菇 $68: 8分, 要了兩客花膠菜膽燉花菇, 大家分吃. $68一客, 不算便宜的價位, 但也是有相當水準. 湯係相當清甜, 菜膽幾靚, 加上花膠同花菇, 小弟一向喜歡清的湯, 這一個, 正對口味.

鮮拆圍蝦煮勝瓜 $98: 9分, 也是個相當清淡的菜色, 只係簡簡單單的勝瓜, 加上小小蝦肉, 但係個湯底就係個精華, 當湯飲也一樣得. 蝦用上圍蝦, 尺碼適中, 也幾鮮甜.

鮑魚汁珍菌素千層 $88: 7分, 個鮑魚汁係幾香濃, 但偏杰身, 也比較油, 或許整體輕一點會更好.

豉蒜涼瓜炆海參 $138: 7分, 也係偏油的一道菜, 當然用上豉蒜去炒一定會比較濃味, 但輕手一點會更合小弟心意. 海參夠淋, 沾上了豉蒜, 都幾搶的. 但講到做涼瓜, 還是喜歡文迪的出品.

飄香荷葉飯 $25: 6分, 在幾家星店也有吃過荷葉飯, 也在這裡吃吃吧. 要了兩客分吃, 怎知道份量是這麼的小, 只有大半碗飯的份量, 實在兩三下已經吃完, 不是填肚之選. 荷香是沒有的, 飯也帶點濕, 不太對勁.

養顏杏仁茶 $20: 8分, 甜品方面, 先要了兩客杏仁茶. 份量又係偏細, 好像茶杯大小. 杏仁味係相當香濃, 不會太甜. 但這裡做的不是蛋白杏仁茶, 沒有了蛋白, 總覺得係差了點甚麼似的.

喜疊蟠桃 $28: 5分, 相當失望. 小小的壽包, 是翻蒸的, 午市剩下的? 包是實實的, 係蓮蓉還幾香, 勉強合格啦.

服務是麻麻, 人客不太多下, 加茶還是比較慢, 態度也不太友善, 不過應做的, 也有做.

整體食物, 算中上, 花膠菜膽燉花菇同埋鮮拆圍蝦煮勝瓜是很出色的, 其他菜色平均也有一定水準, 係個壽包最差. 加上這裡的環境, 是值得一試的. 至於會否再來, 相信又未必了.

評分
味道: 7/10
環境: 7/10
服務: 5/10
抵食: 6/10
推介度: 6/10

餐廳資料:
翠玉軒

中環干諾道中8號交易廣場2期4樓
2525 1163