夜上海 - 偏貴

新一年的米芝蓮的選擇多了不少, 要一一吃完也要點時間. 當然, 這個名單只係參考作用, 餐廳是否閣下的心頭好還是有待吃過後才得出結果. 不過人家有這個名單, 跟著去吃一下, 見識也好, 比較也好, 也是無無妨.

第一間想吃的是夜上海, 在酒店內的餐館. 星期五晚來到, 剛好是名單公佈的第二晚, 現場是人山人海, 是星星效應, 還是這裡的基本盤? 人多的關係, 是相當嘈雜, 環境比一般中餐館來講是幾有型格. 餐牌的選擇幾長, 最後揀了好幾樣食物分吃, 試多一點嘛.

肉汁小籠包 $44: 8分, 是真的做到有肉汁的效果, 也幾有鮮味, 皮沒有穿, 係嫌厚了點點.

陽澄湖海鮮湯 $80: 8分, 相當鮮甜的湯, 沒有腥味, 足料, 又蟹又蝦, 不過份量偏小, 收到$80一客, 只勉強有一人份量.

蟹粉釀蟹蓋 $120: 5分, 這個是$120兩隻蟹蓋, 賣相係幾靚, 連個盤也有考究. 面頭舖滿了蟹粉, 但跟底下的蛋白係不能溝埋, 各自為政. 有蟹殼. 蟹粉不夠鮮味, 下面的蛋白不夠滑. 還有不少地方的蟹蓋比這裡出色.

蔥油開洋拌麵 $45: 5分, 實在係相當細碗, $45一客, 份量真係一個人也嫌小, 麵條不彈牙, 吃落口像油麵, 蔥油也不夠香, 蝦不夠香, 沒有選用蝦米, 令香味大減, 幾失望.

桂花蜜汁火方 $70: 6分, 只是2人份量, 火方肉質偏實, 蜜汁味不夠, 但桂花味就幾足, 吃落口係幾清新.

特式甜品拼盤 $110: 7分

栗子芝士蛋糕.朱古力雪葩 $48: 栗子味道剛好, 隱隱散發在件芝士蛋糕入面, 芝士係比較輕的那一種. 相對淡淡然的蛋糕, 上面的朱古力雪葩就好搶味, 是個不俗的配搭.

香米布甸.茉莉茶雪糕 $42: 怎樣也吃不出茉莉茶的味道, 只係覺得好淡, 或許茉莉茶不太適宜做雪糕吧. 香米布甸像在吃焦糖布甸一般, 但就比較淡.

香芒酥皮餅 $38: 這裡的特式甜品也想做到在傳統的西式甜品上加上點點中式的原素. 三客甜品中就以這個香芒酥皮餅做得最好. 還以為是普通拿破崙, 原來用上了腐皮, 這樣去扭一扭橋, 成個感覺就不同了. 當然沒有西式的脆, 但腐皮跟芒果又有意料之外的化學作用.

連埋甜品吃了八樣菜色, 但好像完全沒有飽的感覺. 始終每樣食物的份量都係比較細. 不過價位就偏貴, 以抵吃度來講就只係一般. 服務還算不錯. 不過食物水準參差, 整體來講只屬一般, 吃了好幾樣這裡的招牌/推薦菜色, 只能講, 小弟不會推介大家來這裡吃一餐. 比這裡經濟, 又好吃的同類型餐館還有不少呢.

評分
味道: 6/10
環境: 7/10
服務: 7/10
抵食: 6/10
推介度: 6/10

餐廳資料:
夜上海

尖沙咀廣東道馬哥勃羅香港酒店6樓

2376 3322